मराठी साहित्य – कवितेचा उत्सव ☆ जेजुरीच्या खंडेराया… ☆ सुश्री तृप्ती कुलकर्णी ☆

सुश्री तृप्ती कुलकर्णी

 कवितेचा उत्सव 

☆ जेजुरीच्या खंडेराया… ☆ सुश्री तृप्ती कुलकर्णी ☆

हे जेजुरीच्या खंडेराया दर्शनाला पाव रे ||

सूडाचा अग्नी कसा विझवायाचा सांग रे

मत्सराचा कंद कसा उपटायाचा सांग रे

आनंदाने जगायची रीत भली दाव रे

हे जेजुरीच्या खंडेराया दर्शनाला पाव रे ||

‘येळकोट येळकोट’ व्हावा सदा गजर

श्रद्धेचा अन् मुक्तीचा मनी व्हावा जागर

‘मी’पणाचा छंद आता मोडूनी काढ रे

हे जेजुरीच्या खंडेराया दर्शनाला पाव रे ||

बिल्वपत्र वाहूनी , भंडाराही उधळू रे

षड् रिपूतून मुक्ती होता जगणे सोने होई रे

सोनेरी या जगण्याची गोडी तूच दाव रे

हे जेजुरीच्या खंडेराया दर्शनाला पाव रे ||

मणीमल्लांपासूनी तारिशी तू अवनी

सत्यधर्मारक्षण्या तू अधर्मा संहारीले

भक्तांसाठी नाना रूपे तूची साकारीले

हे जेजुरीच्या खंडेराया दर्शनाला पाव रे ||

नरजन्मा सार्थककरण्या मार्ग मला दाव रे

चरणी तुझ्या आले आता तूची मज उद्धार रे

हे जेजुरीच्या खंडेराया दर्शनाला पाव रे ||

©  सुश्री तृप्ती कुलकर्णी

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈