मराठी साहित्य – कवितेचा उत्सव ☆ खात्री असू दे… ☆ सुश्री नीलांबरी शिर्के ☆

 कवितेचा उत्सव  

☆ खात्री असू दे… ☆ सुश्री नीलांबरी शिर्के ☆

☆

‘मंदिर त्याचे अयोध्येमध्ये

माझे का नाही  ?’… 

रुसून बसला बाळकृष्ण

अन् बोलेना काही… 

*

‘द्वारकेआधी जन्मलास ना 

अयोध्येत तू रामरूपाने

का मग रूसतो सांग कन्हैया

उगीच आता हट्टाने !…  

*

सोड हट्ट हा आणिक रुसवा 

लवकर जा रे गोधन घेऊनी 

गोपाल तुझी बघ वाट पहाती

हुंदडायला वनरानी…

*

रुसू नको रे पूर्ण होऊ दे 

अवधनगरी ती सर्वांगानी 

मथुरेतही मग होईल सारे 

खात्री असू दे तुझ्या मनी ‘ —

☆

©  सुश्री नीलांबरी शिर्के