कविराज विजय यशवंत सातपुते
कवितेचा उत्सव # 216 – विजय साहित्य
☆ संत एकनाथ… ☆ कविराज विजय यशवंत सातपुते ☆
(अष्टाक्षरी रचना)
☆
भानुदासी कुळामध्ये
एकनाथ जन्मा आले.
वयवर्षे फक्त बारा
जनार्दने गुरू केले.
*
दत्त दर्शनाचा योग
देवगिरी सर्व साक्षी
तीर्थाटन करूनीया
आले पैठणच्या क्षेत्री.
*
नाथ आणि गिरिजेचा
सुरू जाहला संसार
गोदा,गंगा, आणि हरी
समाधानी परीवार.
*
बोलीभाषेतून केले
भारूडाचे प्रयोजन.
लोकोद्धारासाठी केला
अपमान ही सहन.
*
ईश्वराचे नाम घेण्या
नको होता भेदभाव
एकनाथी रूजविले
शांती, भक्ती, हरिनाम.
*
नाना ग्रंथ निर्मियले
लाभे हरी सहवास.
विठू, केशव, श्रीखंड्या
नाथाघरी झाला दास.
*
दत्तगुरू द्वारपाल
नाथवाडी प्रवचन
देव आले नाथाघरी
नाथ देई सेवामन.
*
नाथ कीर्तनी रंगल्या
गवळणी लोकमाता.
समाधीस्त एकनाथ
कृष्ण कमलात गाथा.
*
केले लोक प्रबोधन
प्रपंचाचे निरूपण.
सेवाभावी एकनाथ
भक्ती, शक्ती समर्पण.
*
वद्य षष्ठी फाल्गुनाची
नाथ षष्ठी पैठणची
सुख,शांती,धनसौख्य
नाथ कृपा सौभाग्याची.
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
