सौ. उज्वला सुहास सहस्रबुद्धे
☆ ऋतूचक्र… ☆ सौ. उज्वला सुहास सहस्रबुद्धे ☆
☆
उन्हाळा, पावसाळा अन् हिवाळा,
ऋतूंच्या पायात घातला वाळा !
*
रुम झुम करीत पदरव येई,
जेव्हा येतो मनी उन्हाळा!
झळा लागती मना उन्हाच्या,
शांत करीत असे ओला वाळा!…१
*
पावसाची सर जेव्हा येई,
वळीव गारवा आणतसे !
तप्त मातीवर पाणी शिंपित,
थंडावा तो देत असे !….२
*
चाहूल लागे वर्षेची,
मोर मनीचा करतो नाच!
त्याची केका रानी गर्जे,
मोर पिसारा फुलवी हाच!….३
*
श्रावणधारा येती सरसर,
मनास मिळे तेव्हा उभारी!
तालावर नाचे मन मयूर,
ओली होई सृष्टी सारी !…४
*
वर्षे मागून हळूच वाही,
थंडीची ती गार हवा !
शेकोटीची घेऊन ऊब ,
मिळत असे आनंद नवा!…५
*
तीन ऋतूंचे गाणे मनात,
सातत्याने गुंजन घाली !
त्याच्या तालावर सृष्टीचे,
कालबद्ध नर्तन चालू राही!….६
☆
© सौ. उज्वला सुहास सहस्रबुद्धे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
