☆ कवितेचा उत्सव ☆
☆ लेकीची पाठवणी ☆ सौ. सुरेखा कुलकर्णी ☆
☆
माय बापाची लाडाची
कन्या निघाली सासरी
लग्न समारंभ झाला
दिली सासूच्या पदरी
*
लाड कोड पुरविले
संस्कारांनी घडविले
आहे त्या परिस्थितीत
छान तिला वाढविले
*
रोप तुळशीचे सान
दुजा अंगणी लावावे
गुण दोष समजूनी
तुम्ही तिला सांभाळावे
*
एका नयनी आसवे
तर दुजात आनंद
मिळे पती सुयोग्यसा
चाल तिची मंद मंद
*
सुखे राहावे सासरी
दोन घरांना जोडाया
प्रेम धागे गुंफावेत
लेक चालली नांदाया
☆
© सौ. सुरेखा कुलकर्णी
सातारा
≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
