श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 240
☆ कुटील कावा आनंदकंद☆ श्री अशोक श्रीपाद भांबुरे ☆
☆
संसार संपदेशी नाही कधीच केला
होकार मी दिलेला निःस्वार्थ भावनेला
*
प्रेमात वादळाचे येणे कमाल नाही
पाहून सख्य अपुले तोही निघून गेला
*
तू सागरात आहे मी टाकलेय जाळे
जाळ्यात मासळीचा दमछाक जाहलेला
*
कटला पतंग होता नव्हते भविष्य त्याला
तू झेलल्यामुळे तो आहेच वाचलेला
*
हुंकार देउनी तो वारा पसार झाला
नाही कुणीच सोबत एकांत जागलेला
*
पसरून चादरीवर आकाश चांदण्यांचे
वाटेवरील डोळे हातात दुग्ध पेला
*
नाही कुटीळ कावा सत्यावरी भरवसा
देऊ कशास थारा नादान कल्पनेला
☆
© श्री अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
