डॉ. प्राची जावडेकर
अल्प परिचय
व्यवसायाने दंत वैद्य, ठाणेकर.
कवयित्री, निवेदिका
श्यामरंग… त्या त्यांचे प्रश्न आणि कृष्ण , राधायन या दोन संगीत नाट्यविष्कारांचे लेखन.
कवितेचा उत्सव
☆ आत्मरंगी ऊन... ☆ डॉ. प्राची जावडेकर ☆
☆
उन्हाच्याच गावी, उन्हाचेच रस्ते
उन्हाच्याच वाटांत हरवायचे.
*
रुईच्या फुलांना कुणीही विचारा
उन्हाच्या घराला कसे जायचे?
*
खुळी ‘लाजरी’ अंग झोकून देई
उन्हाच्या झळांनी तिला न्हायचे.
*
सुगंधी उन्हे माखुनी अंगअंगी
सुरंगी म्हणे केशरी व्हायचे!
*
कवे घेतसे शीतपुष्पी उन्हाळा
कवडशांतुनी ऊन झिरपायचे.
*
उठे पेटुनी अग्निशीखा ज्वराने
तिच्या प्रीतीने ऊन वितळायचे.
*
मरुत वाहतो या उन्हाच्या पखाली
उन्हाने उन्हालाच भिजवायचे.
*
उन्हाच्या समुद्री उन्हाच्याच लाटा
किनारे उन्हाचेच चमकायचे.
*
मृदेला उन्हाचा लळा लागलेला
उन्हांनी कसे सांग परतायचे?
*
असे हे उन्हाळे जसे की जिव्हाळे
जीवाला उन्हानेच निववायचे!
☆
© डॉ. प्राची जावडेकर
मो. ९६७३०१२०९०.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
