सुश्री तृप्ती कुलकर्णी
कवितेचा उत्सव
☆ पाऊस कविता — ओढ / सोबत ☆ सुश्री तृप्ती कुलकर्णी ☆
(१) ओढ
प्रियन !
मी एक माझ्या नावाची
होडी सोडते,
तू ही एक तुझ्या नावाची
होडी सोड,
आपण नाही भेटलो तरी
त्या भेटतीलच एखाद्या लाटेत
अन् पोहोचवतील एकमेकांपर्यंत
आपली ओढ
(२) सोबत…
प्रियन !
तुला तिथल्या चांदण्यातही
थोडा पाऊस हवा
मला इथल्या पावसातही
थोडं चांदणं हवं
थोडा तू पाऊस घे,
थोडं मी घेते चांदणं
माझ्या ओल्या उशी खाली
तुझ्या उष्ण निश्वासाला
प्रियन !
एवढी सोबतही आता पुरेशी आहे!
© सुश्री तृप्ती कुलकर्णी
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
