मराठी साहित्य – कवितेचा उत्सव ☆ “☆ धोक्याच्या वळणावरती — ” ☆ श्री नितीन सुभाष चंदनशिवे ☆

श्री नितीन सुभाष चंदनशिवे

 कवितेचा उत्सव  

☆ “धोक्याच्या वळणावरती —…” ☆ श्री नितीन सुभाष चंदनशिवे ☆

☆

तुझा सारा गाव झोपला की,

ये भेटायला मागच्या दारानं

पण गाव उठायच्या आत

माघारी जाशीलच याची शास्वती

मी देत नाही

*

अल्लड वाऱ्याला जीव लावणं

बरं नव्ह बाई,

या वयाला विश्वासाची पावती

देता येत नाही

*

मिठीत घेणारा वारा गार असेलही

पण तो झोंबणारच नाही याचा

भरवसा मी देत नाही

*

संसाराच्या गप्पा बऱ्या वाटतात

पण संसारात गप्पाच असतील

याची खात्री मी घेत नाही

*

थांब म्हणावं पावलांना

या वयात पोरी

हा बाजिंदपणा बरा नाही

हा वारा काही खरा नाही

*

आणि तुझा गाव झोपलाच असेल

यावर माझा विश्वास नाही.

कवी : नितीन चंदनशिवे. (दंगलकार)

© श्री नितीन सुभाष चंदनशिवे

संपर्क – मु. पोस्ट. कवठेमहांकाळ, जि. सांगली.

मो 7020909521

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈