सुश्री दीप्ती कुलकर्णी
कवितेचा उत्सव
☆ नाते स्वर्ग-धरेचे… ☆ सुश्री दीप्ती कुलकर्णी ☆
आपल्या समूहातील लेखिका व कवयित्री सुश्री दीप्ती कुलकर्णी यांना नुकताच “माझी लेखणी साहित्य मंच “ ता. शहापूर, जि. ठाणे आयोजित, रामायण काव्यलेखन मंच या अंतर्गत “रामायणावर आधारित काव्यलेखन “ या विषयावरील महास्पर्धेत “सर्वोत्कृष्ट काव्यलेखन “ म्हणून प्रथम क्रमांक देऊन गौरविण्यात आले आहे. आपल्या सर्वांतर्फे दीप्तीताईंचे मनःपूर्वक अभिनंदन आणि अशाच यशस्वी साहित्यिक वाटचालीसाठी हार्दिक शुभेच्छा.💐
आजच्या अंकात ही पुरस्कारप्राप्त कविता प्रकाशित करत आहोत.
संपादक मंडळ,
ई – अभिव्यक्ती, मराठी विभाग.
☆ नाते स्वर्ग धरेचे ☆
☆
दिव्य स्वयंवर जनक सुतेचे
विष्णु अंश प्रभु राम -सीतेचे
*
भव्य मंडपी, नृप विश्वाचे
हर्षभरे ऋषी, जन मिथिलेचे
उभी जानकी, जनकाजवळी
मन भरले औत्सुक्याचे ||१||
*
शिवधनु ते अवजड सजले
जनकाने मग पण सांगितला
धनु पेले तो सीतेचा वर
ऐकताच नृप भयभीत झाले ||२||
*
उचलता धनु सारे ते थकले
लंकेशही अपमाने थिजले
यत्न वृथा तो क्रोधित झाले
गुरुआज्ञेस्तव रामही उठले ||३||
*
अलगद हस्ते धनु उचलले
दोर लावता भंगच झाले
कडाडता ते थक्कच सारे
प्रमुदित तर सर्व जाहले ||४||
*
जानकीने त्या क्षणीच वरले
मायपित्यासह पुढे जाहली
तनामनासह माळ अर्पिली
पुष्पवृष्टी स्वर्गातुनन विलसली ||५||
*
नाते स्वर्ग-धरेचे बनले
मिथिलेचे तर भाग्य उजळले
दिव्य स्वयंवर जनक सुतेचे
विष्णु अंश प्रभु राम सीतेचे ||६||
☆
© सुश्री दीप्ती कोदंड कुलकर्णी
कोल्हापूर
भ्र.९५५२४४८४६१
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
