मराठी साहित्य – कवितेचा उत्सव ☆ “मुंगीचा नाच“ ☆ प्रस्तुती – श्री सुहास सोहोनी ☆

श्री सुहास सोहोनी

 कवितेचा उत्सव 

☆ मुंगीचा नाच –  ☆ श्री सुहास सोहोनी ☆

☆

मुन्शिपाल्टीच्या निवडणुका —

मुंगी झाली नगरसेविका —

लोकसेवेच्या व्रतातले —

इंगीत खरे उमगले —

*
मग मुंगीनं केला नाच —

तिला मिळाले पैसे पाच —

एका पैशाचा बांधला बंगला —

तीन मजल्यांचा मोठा चांगला —

*
एका पैशाचं आणलं पीठ —

एका पैशाचं आणलं मीठ —

पिठामिठाची केली भाकर —

एका पैशाचा ठेवला चाकर —

*
एक पैसा रस्त्यात सांडला —

रडून मुंगीनं हंगामा केला —

जणु लाख मोलाची ठेव —

उडु बघे मुंगीचा जीव —

*
कसा नशिबाने केला जांच —

केला मुंगीने हुंदके नाच —

पुन्हा मुंगीने केला नाच —

कोणी बघेना, जिवाला आंच —

*
मग मुंगीने निर्धार केला —

आमदारकीचा अर्ज भरला —

झाली आमदार एवढीशी बया  —

गेली पालटुन सारी रया —

*
मग लाचार मुंगळे धावले —

फेर धरून भंवती नाचले —

केला मुंगीने पुन्हा नाच —

तिला मिळाले खोके पाच —

*
कधी पाचांचे पंचवीस झाले —

त्याचे दुप्पट दसपट झाले —

मुंगीलाही नाही कळले —

रंगे इंद्रधनूषी कांच —

— केला मुंगीनं कथ्थक नाच —

*

कशी सरली वर्षे पाच —

का थांबला मुंगीचा नाच —

कशी पडली दोनदा धाड —

कसं गावलं मोठं घबाड —

*
कसा दोन वर्षांचा काळ —

गजाआड जाईना वेळ —

हितचिंतक दूर पळाले —

मित्रांचे शत्रू झाले —

*
सखि दिसे जरी रस्त्यात

ना दिसे भाव डोळ्यांत —

नच दिसे भेट आनंद —

ना टुकुटुकुचा संवाद —

*
झाला मुंगीला पश्चात्ताप —

म्हणे चुकांचे भरले माप —

स्मरे पिठामिठाची भाकर —

स्मरे जुनापुराणा चाकर —

स्मरे रस्त्यात सांडला पैसा  —

भाग्य घेऊन गेला कैसा —

*
मग मुंगीनं निर्धार केला —

सोडली गाडी आणि बंगला —

धरला रस्ता आपुल्या घरचा —

लाल मातीच्या वारुळाचा —

*
तिथे आप्त सख्या मैत्रिणी —

गेली मुंगी त्यात हरखुनी —

म्हणे मुक्तिचा क्षण तो हाच —

केला मुंगीनं मोराचा नाच —

☘️

© श्री सुहास सोहोनी

रत्नागिरी

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈