श्री हरिश्चंद्र कोठावदे
कवितेचा उत्सव
☆ पारपत्र… ☆ श्री हरिश्चंद्र कोठावदे ☆
(अनलज्वाला)
☆
सूर न जुळला जनी म्हणूनी विजनी आलो
मीच माझिया एकांताची सरगम झालो
*
स्वच्छ चेहरा स्वच्छ आरसा माझा आहे
प्रतिबिंबाहुन आहे सुंदर.. कधी म्हणालो?
*
नाही वंशज मी सूर्याचा.. मान्यच आहे
अंगणात पण अंधाराच्या पणती झालो
*
किती काळ मी उरी जपावी तुमची गुपिते
किल्मिष सारे घेता पोटी.. समुद्र झालो
*
स्वप्नामधले वचन पाळले.. त्याची शिक्षा
डोंबाघरचे भरण्या पाणी.. तयार झालो
*
उघडताच तो तिसरा डोळा…होइल तांडव
डिवचु नका रे भोळ्या सांबा.. सांगत आलो
*
अनवाणी ही वारी माझी.. आता खंडित
विठू तोतया, छद्म पंढरी.. सावध झालो
*
गावशिवेतुन हकालपट्टी झाल्यानंतर
पारपत्र मी दाहि दिशांचे घेउन आलो !
☆
© श्री हरिश्चंद्र कोठावदे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
