डॉ. शैलजा करोडे
कवितेचा उत्सव
☆ “चष्मा…” ☆ डॉ. शैलजा करोडे ☆
☆
चष्मा चाळीशीचा डोळी
देई प्रौढत्व जाणीव
अनुभव समृद्धिची
भासू ना देई उणीव
*
धुसरले जग सारे
चष्मा सुस्पष्ट करते
अनुभव संपन्नता
जीवनाचे धडे देते
*
सल्ला द्या नवपिढीस
सक्ती मात्र ती नसावी
जुन्या नव्या संगमाची
कास नेहमी धरावी
*
काळ वेळ बदलते
बदलते जग सारे
चष्मा नंबर बदला
दिसतील तेज तारे
*
रंग बिरंगी गाॅगल
दावी दुनिया रंगीन
सकारात्मकता मग
होऊ ना देई मलीन
*
चष्मा घोड्याचा लावून
नाही जगावे जीवन
माणुसकी चष्मा लावा
तत्व जाणावे गहन
☆
© डॉ. शैलजा करोडे (काव्यशलाका)
नेरुळ नवी मुंबई मो. 9764808391
ईमेल – [email protected]
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
