कविराज विजय यशवंत सातपुते
कवितेचा उत्सव # 239 – विजय साहित्य
☆ कष्टाची किंमत… ☆
(काव्यप्रकार अष्टाक्षरी.)
☆
आंबा चिंच ,जांभुळाची ,
बांधावर झाडी दाट.
बेल,पिंपळ, उंबर,
दावी गायरान वाट. १
*
रामफळ,भोकराने ,
दिली अवीटशी गोडी.
बोर,डाळींब,आवळा ,
नाचे राघू मैना जोडी. २
*
पिके नगदी घेताना ,
सोनं देई काळी माती.
ज्वारी,बाजरी पिवळी,
तेलबिया ,डाळी, हाती.३
*
भुईमुग, कापसाचा ,
आगळाच असे थाट.
मळ्यातल्या पाटावरी,
ऊस वाढे घनदाट.४
*
शालू हिरवा नेसून ,
साद घाली लेकराला.
मोती घामाचे लावती,
शिरपेच वावराला.५
*
जितराब दावणीचं,
जिवलग जोडीदार.
दुध दुभत्याने मिळे,
रोज अमृताची धार.६
*
भाजी भाकरीची गोडी,
नाही येणार कश्याला.
कळे कष्टाची किंमत,
तुझ्या नाजूक खिश्याला.७
*
देई जिवाला या जीव,
गडी माणूस राबता.
गुळपाक पोळीमध्ये,
सण थांबतो नांदता.८
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
