सौ राधिका भांडारकर
कवितेचा उत्सव
☆ “आयुष्याच्या ताम्रपटावर…” ☆ सौ राधिका भांडारकर ☆
☆
धूळ झटकता पटलावरची
लख्खच सारे दिसू लागले
जरी दडवले होते काही
सारेच कसे पुन्हा उजळले॥१॥
*
वाटेवरचे क्षण काटेरी
तसेच काही आनंदाचे
पुन्हा एकदा त्यात हरवले
सुटले धागे सुखदुःखाचे॥२॥
*
मुठीत वाळू हळू सांडली
प्रीत अव्यक्त मनात दडली
काळजातली हुरहुर सारी
आवेगाने कशी दाटली ॥३॥
*
निष्ठा साऱ्या मी बाळगल्या
देणी घेणी चुकती केली
बाकी सारे शून्य जाहले
आता कसली भीती नुरली॥४॥
*
आयुष्याच्या ताम्रपटावर
एक ओळ ती होती धूसर
शब्द प्रितीचे कोवळ्यातले
तिथे राहिले कसे आजवर
☆
© सौ. राधिका भांडारकर
ई ८०५ रोहन तरंग, वाकड पुणे ४११०५७
मो. ९४२१५२३६६९
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
