मराठी साहित्य – कवितेचा उत्सव ☆ आई… ☆ श्री विष्णू सोळंके ☆

श्री विष्णू सोळंके

अल्प परिचय

जन्म – १५/४/१९५९

साहित्य आणि सम्मान – 

• जवळपास १९८१ पासून मराठी गीत गझल, व ललित लेखन.
• चार कविता संग्रह, दोन ललित लेख संग्रह, दोन व्यक्ती चरित्र पुस्तक अशी आठ पुस्तके प्रकाशित झाली आहेत.
• संत गाडगेबाबा अमरावती विद्यापीठाचे बी. एस. सी. भाग १ मधे कविता अभ्यासक्रमात समाविष्ट.
• कामगार कल्याण मंडळ गुणवंत कामगार कल्याण पुरस्कार २००५ मधे आर आर पाटील यांच्या हस्ते प्राप्त.
• कवयित्री शांता शेळके यांचे हस्ते गीत लेखन पुरस्कार पुणे येथे.
• अखिल भारतीय मराठी साहित्य संमेलन, विदर्भ साहित्य संमेलन यामध्ये अनेक वर्षे पासून निमंत्रित कवी म्हणून सहभागी.
• मुंबई दुरदर्शन नागपूर आकाशवाणी केंद्रावर प्रसारण.
• महाराष्ट्रातील अनेक दिवाळी अंकात कविता प्रसिद्ध.
• अमरावती विद्यापीठाच्या पी. एच. डी. करीता समग्र साहित्यावर माण्यता..

 कवितेचा उत्सव 

☆ आई… ☆ श्री विष्णू सोळंके ☆

☆

सोडून हात माझा आई कुठे निघाली

आता व्यथाच सारी माझ्या घरात आली… १

*

आई तुझा दिलासा देतो मला सहारा

माझा तुझ्याविनागे नाही कुणीच वाली…. २

*

आहे तुझी प्रतिमा हृदयामधेच आई

जातील हे जरीही अश्रू सुकून गाली…. ३

*

माहित हे मला की येशील ना कधी तू

तू नेहमीच माझ्या असतेस भोवताली… ४

*

पदरात फाटक्या या माझी असे शिदोरी

मातीत या कुणाची झोळी नसेल खाली…. ५

☆

© श्री विष्णू सोळंके

काव्य संध्या मुदलियारनगर अमरावती ४४४६०६ – मो ७०२०३००८२४