सौ. उज्वला सुहास सहस्रबुद्धे
कवितेचा उत्सव
☆ सरता श्रावण… ☆ सौ. उज्वला सुहास सहस्रबुद्धे☆
आला सरता श्रावण ,
मन माझे हुरहुरे !
वर्षेची ती रिमझिम,
अंगणात झुर झुरे !
जाई पावसाची सर ,
भिजवी सृष्टीचा शेला!
दिसे नभी अंगावर ,
इंद्रधनुष्याची माला !
हिरवीगार ही सृष्टी ,
लोभवते क्षणोक्षणी!
किमया ही निसर्गाची,
भूल घाली मनोमनी !
अरे, श्रावणा,श्रावणा,
तुझे अप्रूपच मोठे !
कृष्णजन्माची ती वेळा,
नेते आनंदाच्या वाटे!
सृष्टी गीत गाता गाता,
जाई श्रावण पाऊल !
स्वागताला आतुरलो ,
लागता गणेश चाहूल !
© सौ. उज्वला सहस्रबुद्धे
वारजे, पुणे (महाराष्ट्र)
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
