कवितेचा उत्सव
☆ पाऊस असा पडावा… ☆ श्री शरद कुलकर्णी ☆
पाऊस असा पडावा
जुना शिशिरही कळावा.
पानगळीच्या वृक्षांशी,
स्नेह नव्याने जडावा.
पाऊस असा पडावा,
रक्तात मल्हार न्हावा.
मैफलीत सांगतेच्या,
स्वर आतला कळावा .
पाऊस असा पडावा,
पाऊस असा जडावा.
अव्यक्त सार्या व्यथांचा,
अभिव्यक्तीने व्यक्त व्हावा.
पाऊस असा पडावा ,
पाऊस असा कळावा.
थेंब होउन छोटा,
पापणीत बंद व्हावा.
पाऊस असा पडावा,
मृदगंधाचा सुगंध यावा.
मृगदुग्धांच्या सरींनी ,
अर्थ आईचा कळावा.
© श्री शरद कुलकर्णी
मिरज
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
