श्री आनंदहरी
कवितेचा उत्सव
☆ अभंग… ☆ श्री आनंदहरी ☆
तुला भेटण्याला । मन हे आतुर ।
तरी दूर दूर । राहसी तू ।।
हवीशी वाटते । तुझी नित्य वारी ।
धाम माझे चारी । तुझ्याठायी ।।
अशी लावलीस । जीवाला या ओढ ।
मन झाले द्वाड । तुझ्यासाठी ।।
नको नको आता । दुजा पाश काही ।
अंतरात पाही । तूंचि एक ।।
कधी मी पाहीन । तुला याची डोळा ।
जिवा या आगळा । ध्यास आहे ।।
तुला का न माझा । येतसे आठव ।
तूच तू भेटव । तुज मला ।।
© श्री आनंदहरी
इस्लामपूर, जि. सांगली
भ्रमणध्वनी:- 8275178099
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
