सुश्री ज्योत्स्ना तानवडे
चित्रकाव्य
– स्वागत दिवाळीचे – ☆ सुश्री ज्योत्स्ना तानवडे ☆
☆
गेले ऊन पावसाळे
एकमेकांच्या जोडीने
करी दिवाळी साजरी
अंतरातल्या गोडीने ||
☆
झाडलोट झोपडीची
स्वच्छ केले अंतरंग
कसे कावेच्या रंगाने
पालटले रूपरंग ||
☆
केले सडा सारवण
दिसे शोभूनी अंगण
करी प्रसन्न मनाने
रांगोळीचे रेखाटन ||
☆
मनी आकाशकंदील
समाधानाची पणती
सारे खेळ हे मनाचे
हवी जगण्यात तृप्ती ||
☆
मनी तेवल्या पणत्या
उत्साहाचे हे स्वागत
सण साजरा होताना
आनंदाची बरसात ||
☆
चित्र साभार – सौ.ज्योत्स्ना तानवडे
© सौ.ज्योत्स्ना तानवडे
वारजे, पुणे.५८
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
