(सुश्री प्रभा सोनवणे जी हमारी पीढ़ी की एक वरिष्ठ मराठी साहित्यकार हैं । प्रस्तुत है सुश्री प्रभा जी की एक संवेदनशील एवं भावप्रवण मराठी कविता “मृगचांदणी”)
☆ मृगचांदणी ☆
आमच्या उंच इमारतीच्या टेरेस वर
मी एकटीच !
विस्तीर्ण आभाळाखाली
माझी चिमुकली नजर
काय न्याहाळते आहे?
चौकातले प्रकाशमान दिवे ,
माझ्या पाठीमागे
दिवसभर सौर शक्तीला
स्वतः मध्ये सामावून घेणारी
सोलर सिस्टीम !
टी .व्ही . च्या अन्टेना ,
बुटक्या ,जुन्या घरांमध्ये
उगवलेली
ऐटदार ‘सुंदर हाईटस ‘
कधी काळी ही होती
आमची भव्य वास्तू !
किती सहजपणे बदलतात
मालकी हक्क !
वाडे कोसळून उभारलेल्या
या गगनचुंबी इमारती ……..
जगाच्या पसा-यातले
आपले अस्तित्व
नगण्य वाटू लागते ……….
तेवढयात सळसळते
शेजारचे शिरीषाचे झाड …
वाहत्या वार्याबरोबर
माझ्यापर्यंत येऊन पोहोचते
दरवळती रातराणी
मग मी ही होते —
आभाळातली मृग चांदणी !!
© प्रभा सोनवणे,
“सोनवणे हाऊस”, ३४८ सोमवार पेठ, पुणे – ४११०११
मोबाईल-9270729503
