कविराज विजय यशवंत सातपुते
(आज प्रस्तुत है कविराज विजय यशवंत सातपुते जी की स्वरचित अम्बाजी की आरती अंबारती. )
☆ अंबारती ☆
आरती सप्रेम जय जय जय अंबे माता
कृपा रहावी आम्हां वरती, दे आशिष आता .||धृ||
सदा पाठिशी रहा उभी मुकांबिका होऊनी
शिवशक्तीचे प्रतिक तू सिंहारूढ स्वामींनी
कोल्लर गावी महिमा गाई भक्त वर्ग मोठा .
कृपा रहावी आम्हां वरती, दे आशिष आता .||1||
ब्राम्ही रूप हे तुझेच माते चतुर्मुखी ज्ञानी
सप्तमातृका प्रातः गायत्री हंसारूढ मानी
सृजनदेवता ब्रम्हारूपी रक्तवर्णी कांता
कृपा रहावी आम्हां वरती, दे आशिष आता .||2||
माहेश्वरी रूप शिवाचे , व्याघ्रचर्म धारीणी
जटामुकूट शिरी शोभतो तू सायं गायत्री
त्रिशूल डमरू त्रिनेत्र धारी तू वृषारूढा.
कृपा रहावी आम्हां वरती, दे आशिष आता .||3||
स्कंदशक्ती तू कौमारी तू नागराज धारीणी
मोर कोंबडा हाती भाला तू जगदोद्धारीणी.
अंधकासूरा शासन करण्या आली मातृका
कृपा रहावी आम्हां वरती, दे आशिष आता .||4||
विष्णू स्वरूपी वैष्णवी तू ,शंख, चक्र, धारीणी
माध्यान्ह गायत्री माता तू शोभे गरूडासनी.
मनमोहिनी पद्मधारीणी तू समृद्धी दाता.
कृपा रहावी आम्हां वरती, दे आशिष आता .||5||
नारसिंही भद्रकाली तू,पानपात्र धारीणी
गंडभेरूडा , शरभेश्वर शिवशक्ती राज्ञी
लिंबमाळेचा साज लेवूनी शोभे अग्नीशिखा.
कृपा रहावी आम्हां वरती, दे आशिष आता .||6||
आदिमाया,आदिशक्ती,विराट रूप धारीणी
रण चंडिका शैलजा महिषासूर मर्दिनी
महारात्री त्या दिव्य मोहिनी ,शोभे जगदंबा .
कृपा रहावी आम्हां वरती, दे आशिष आता .||7||
सप्तमातृका रूपात नटली देवी कल्याणी
भगवती तू, माय रेणुका शोभे नारायणी
स्तुती सुमनांनी आरती कविराजे सांगता
कृपा रहावी आम्हां वरती, दे आशिष आता .||8||
यशश्री, 100 ब दीपलक्ष्मी सोसायटी, सहकार नगर नंबर दोन, पुणे 411 009.
मोबाईल 9371319798.
