श्रीमती उज्ज्वला केळकर
वाचताना वेचलेले
☆ अप्रूप पाखरे – 25– रवींद्रनाथ टैगोर ☆ प्रस्तुति – श्रीमती उज्ज्वला केळकर ☆
[११७]
या माझ्या लहानशा जगात
राहतो मी दिवसरात्र जपत
क्षुद्र …क्षुल्लक … क्षीण गोष्टी
उचलून घे ना मला
तुझ्याच जगात
आणि दे स्वातंत्र्य
अगदी आनंदाने
स्वत:लाच हरवून टाकण्याचे
पुसून टाकण्याचे …
[११८]
परिवर्तनाचं वैभव असतो
काळ म्हणजे
पण घड्याळ जेव्हा
विडंबन करतं काळाचं
तेव्हा शिल्लक रहातं
केवळ परिवर्तन
एका क्षणाचं दुसर्‍या क्षणात
वैभवाचा मागमूसही
नसतो त्यात….
[११९]
दिवा विझल्यावर
अधिकच मादक बनून
मला बिलगणार्‍या
माझ्या प्रियेसारखी
चारी बाजूंनी
जाणवत रहाते मला
ही काळोखी रात्र
विलक्षण सौंदर्याचा
रेशमी पोत असलेली
[१२०]
धुकं पूर्णपणे वितळल्याशिवाय
स्वच्छ प्रकाशात नाही
सकाळचा सूर्य
तशी
माझं नाव पुसून टाकल्याशिवाय
ओसंडत नाही
तुझ्या नामाची माधुरी
मूळ रचना – स्व. रविंद्रनाथ टैगोर
मराठी अनुवाद – रेणू देशपांडे (माधुरी द्रवीड)
प्रस्तुति – श्रीमती उज्ज्वला केळकर
176/2 ‘गायत्री’, प्लॉट नं 12, वसंत साखर कामगार भवन जवळ, सांगली 416416 मो.- 9403310170
≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
