श्री सुहास रघुनाथ पंडित
वाचताना वेचलेले
☆ श्रीसमर्थ रामदास स्वामीकृत – ॥ 🥭 आंबा 🥭॥ ☆ श्री सुहास रघुनाथ पंडित ☆
ऐका ऐका थांबा थांबा ।
कोण फळ म्हणविले बा ।
सकळां फळांमध्ये आंबा ।
मोठे फळ ॥१॥
त्याचा स्वाद अनुमानेना ।
रंग रुप हे कळेना ।
भूमंडळी आंबे नाना ।
नाना ठायी ॥२॥
मावे हिरवे सिंधुरवर्ण ।
गुलाली काळे गौरवर्ण ।
जांभळे ढवळे रे नाना जाण ।
पिवळे आंबे ॥३॥
आंबे एकरंगी दुरंगी ।
पाहो जातां नाना रंगी ।
अंतरंगी बाह्यरंगी ।
वेगळाले ॥४॥
आंबे वाटोळे लांबोळे ।
चापट कळकुंबे सरळे ।
भरीव नवनीताचे गोळे ।
ऐसे मऊ ॥५॥
नाना फळांची गोडी ते ।
आंब्यामध्ये आढळते ।
सेपे कोथिंबिरी वासाचे ।
नानापरी ॥६॥
आंबे वाकडेतिकडे ।
खर्बड नाकाडे लंगडे ।
केळे कुहिरे तुरजे इडे ।
बाह्याकार ॥७॥
कोयी लहान दाणे मोठे ।
मगज अमृताचे साटे ।
हाती घेतां सुख वाटे ।
वास येतां ॥८॥
सोफ सालीहि असेना ।
नासक वीटक दिसेना ।
टाकावे वस्त्रावरी नाना ।
कोरडे आंबे ॥९॥
एक आंबा वाटी भरे ।
नुस्ते रसामध्ये गरे ।
आतां श्रमचि उतरे ।
संसारीचा ॥१०॥
आंबा तणगाऊ नासेना ।
रंग विरंग दिसेना ।
सुकतां गोडी हि सांडिना ।
कांही केल्या ॥११॥
भूमंडळी आंबे पूर्ण ।
खाऊन पाहतो तो कोण ।
भोक्ता जगदीश आपण ।
सकळां ठायी ॥१२॥
नाना वर्ण नाना स्वाद ।
नाना स्वादांमध्ये भेद ।
नाना सुवासे आनंद ।
होत आहे ॥१३॥
आंबे लावावे लाटावे ।
आंबे वाटावे लुटावे ।
आंबे वांटितां सुटावे ।
कोणातरी ॥१४॥
नाही जळ तेथे जळ ।
कां ते उदंड आम्रफळ ।
परोपकाराचे केवळ ।
मोठे पुण्य ॥१५॥
पुण्य करावे करवावे ।
ज्ञान धरावे धरवावे ।
स्वये तरावे तरवावे ।
एकमेकां ॥१६॥
मी तो बोलिलो स्वभावे ।
यांत मानेल तितुके घ्यावे ।
कांही सार्थक करावे ।
संसाराचे ॥१७॥
दास म्हणे परोपरी ।
शब्दापरीस करणी बरी ।
जिणे थोडे ये संसारी ।
दो दिसांचे ॥१८॥
– श्री समर्थ रामदास स्वामी
© सुहास रघुनाथ पंडित
सांगली (महाराष्ट्र)
मो – 9421225491
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
