वाचताना वेचलेले
🌺 “फक्त भेट…” 🌺 प्रस्तुती – श्री सुनीत मुळे ☆
पार्टी नकोय मित्रा तुझी
येवून फक्त भेटत जा
काय चाललंय मनात तुझ्या
भेटून फक्त बोलत जा
मोकळं सोड स्वतःला जरा
कधीतरी मोकळं होत जा
हलकं वाटेल तुझंच तुला
मन रिकामं करत जा
जुन्या आठवणी गप्पागोष्टी
आमच्यात सुद्धा रमत जा
आलेच कधी वाईट विचार
बिनधास्त फोन करत जा
काय आहे आयुष्य अजून
निदान मनातले वाटत जा
पहा किती फरक पडतो
आनंद तेव्हढा लुटत जा
पन्नाशीला आलोय आपण
संपर्कात तेव्हढं रहात जा
काय हवं काय नको तुला
कुणाला तरी सांगत जा
मित्र असतात कशासाठी
मैत्री तेव्हढीच जपत जा
आम्ही फक्त मस्त जगतो
तसाच मस्त जगत जा
पैसा नाही लागत त्याला
मनातले मात्र सांगत जा
पार्टी नकोय मित्रा तुझी
येवून फक्त भेटत जा ……
येवून फक्त भेटत जा ……
संग्राहक : श्री सुनीत मुळे
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
