श्री अशोक श्रीपाद भांबुरे
☆ साप्ताहिक स्तम्भ – अशोक भांबुरे जी यांची कविता अभिव्यक्ती # 73 ☆
☆ गीत – लावणी ☆
यूट्यूब लिंक >> रंगणार विडा नक्की
स्वर : सावनी रविंद्र :: संगीत : सागर – संतोष :: गीत : अशोक भांबुरे
रंगमहाली बैठक जमली
पानविड्यांनी मैफिल रंगली
चुना लावला, कात पेरला, त्यात सुपारी पक्की
रंगणार, राया विडा हा नक्की… धृ
पान मनाचं माझ्या कोर
नाजूक देठाच हिरवं गार
अलगद घ्याना तळहातावर
थोडं केशर घाला त्यावर
लवंग टोचा, प्रेमाने खोचा, आत सुपारी कच्ची
रंगणार, राया विडा हा नक्की… १
नेसून आले पैठणी कोरी
रागू- मैनेची नक्षी भारी
अवतीभवती होत्या पोरी
तरी दिलाची झालीच चोरी
कुठं शोधावं, काही कळेना, झाले मी वेडी पक्की
रंगणार, राया विडा हा नक्की… २
हवा तेवढा देईल मोका
ईश्काचा दोघे घेऊ झोका
चुकेल माझ्या काळजाचा ठोका
द्याल कधी जर मजला धोका
तक्रार देईल, चौकीत नेईल, पिसाया लागल चक्की
रंगणार, राया विडा हा नक्की… ३
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
