मराठी साहित्य – साप्ताहिक स्तम्भ ☆ कवितेच्या प्रदेशात # 88 – ☆ [1] स्वप्नकळ्या / [2] रानफुले ☆ सुश्री प्रभा सोनवणे

सुश्री प्रभा सोनवणे

(आप  प्रत्येक बुधवार को सुश्री प्रभा सोनवणे जी  के उत्कृष्ट साहित्य को  साप्ताहिक स्तम्भ  – “कवितेच्या प्रदेशात” पढ़ सकते  हैं।)

☆ साप्ताहिक स्तम्भ – कवितेच्या प्रदेशात # 88 ☆

 ☆ [1] स्वप्नकळ्या / [2] रानफुले ☆ 

(दोन जुन्या कविता १९८५/८६ साली लिहिलेल्या….१९८९ ला प्रकाशित झाल्या होत्या! लोकप्रभा मध्ये प्रकाशित झालेली “स्वप्नकळ्या” आवडल्याची सुमारे चाळीस पत्रे आली महाराष्ट्राच्या कानाकोप-यातून!“लोकप्रभा” उदंड खपाचं साप्ताहिक होतं आणि त्या काळात मोबाईल/इंटरनेट नव्हतं!)

[1] स्वप्नकळ्या

माझ्या  स्वप्नांच्या मुग्धकळ्या

उमलल्याच नाहीत,

तुझ्या आयुष्यातले

सुगंधी क्षण-

माझ्या नव्हते तरीही,

गंधवेडे मन धावत राहिले,

तुझ्यामागे उगीचच !

वळचणीला बसलेली

माझी मूक स्वप्ने

आज निसटत आहेत,

पागोळ्यांसारखी !!

(१९८९-लोकप्रभा)

[२] रानफुले

तुझ्या वाटेवर

मी सांडले माझे अश्रू ,

त्यातील वेदनेच्या,

बीजांकुराची-

आज रानफुले झाली आहेत!

तू माघारी आलास तर-

तुला दिसतील त्या फुलांत

माझ्या व्यथित मनाची

हळूवार स्पंदने!

पण तू बदलली आहेस,

तुझी वाट,

आणि माझ्यापर्यंत येणारे रस्ते,

बंद केलेस कायमचेच!

(रविवार सकाळ १९८९ )

© प्रभा सोनवणे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈

Print