मराठी साहित्य – कवितेचा उत्सव ☆ तशीच असते कविता… ☆ श्री सुहास रघुनाथ पंडित ☆

श्री सुहास रघुनाथ पंडित

 कवितेचा उत्सव 

☆ तशीच असते कविता... ☆ श्री सुहास रघुनाथ पंडित ☆

☆

अस्वस्थ मनाच्या हिंदोळ्यावर झोका घेते कविता

गंधित पहाट वा-यासंगे किलबिल करते कविता

शिशिरामधल्या तृणपात्यांवर दवात भिजते कविता

कडेकपारी निर्झरांतुनी झर झर पळते कविता

*

कविता म्हणजे कृद्ध मनाने कडाडणारी वीज

कविता म्हणजे विखार विरहित संस्कारांचे बीज

कविता म्हणजे बालपरीच्या डोळ्यामधली नीज

कविता म्हणजे सौदामिनीच्या चापल्यातील तेज

*

शिवारातल्या मृद्गंधाच्या लहरी म्हणजे कविता

किना-यातल्या वालुकणांची चमचम म्हणजे कविता

मंदिरातल्या दिपामधली वलये म्हणजे कविता

झोपडीतल्या पणतीमधली करुणा म्हणजे कविता

*

कविता म्हणजे अन्यायाच्या प्रतिकाराचे काज

कविता म्हणजे भाषेमधल्या सौंदर्याचा साज

कविता म्हणजे सात्विकतेच्या समईमधले तेज

कविता म्हणजे वीररसावर अंथरलेली शेज

*

मानवतेच्या व्यंगावरचा आसूड म्हणजे कविता

वर वर सोपे,  जगणे अवघड, तशीच असते कविता

☆

© श्री सुहास रघुनाथ पंडित 

सांगली (महाराष्ट्र)

मो – 9421225491

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈