Category: चित्रकाव्य

श्री प्रमोद वामन वर्तक 

 

  चित्रकाव्य  

हाय रे कर्मा..  श्री प्रमोद वामन वर्तक ☆

☆

खूष करता करता पितरांना

जीव हकनाक माशांचा गेला,

बाणगंगेच्या पवित्र तलावात 

मत्स्यभेद त्यांच्या विधीने केला!

*

मृत पानफळांचे क्रियाकर्म,

कोण-कधी-कुठे-कसे करणार?

पाप जिवंतपणीची धुता धुता 

गाठी पुण्य कसे जमा होणार?

*

जरी पाऊल ठेवले विज्ञानाने 

अनेक अतिदूरच्या ग्रहगोलावर,

अंधश्रद्धेचा खोल पगडा आहे 

अजून मूढ जनांच्या मनावर!

*

पुण्यकर्म करतांना सांगोवांगीचे 

नको पर्यावरणाकडे काणा डोळा,

नाहीतर कळणार नाही मंद मानवा

कधी आवळेल तो तुझा गळा!

कधी आवळेल तो तुझा गळा!

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – pradnyavartak3@gmail.com

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

रेणुका धनंजय मार्डीकर

  चित्रकाव्य  

बहुगुणी अंबाडी…  रेणुका धनंजय मार्डीकर ☆

(भावगीत- वर्णसंख्या १६यति ९ व्या अक्षरावर)

☆

पानी खुदकन हसली लाल कळी देखणी

श्वेत गुलाबी रंगावली भासे जणू चांदणी ||ध्रु||

*

पर्णिकेत औषधी सारी नाम तिचे अंबारी 

व्यंजनात भाजी साजरी पुष्प पाकळी न्यारी

कात्यायनी म्हणती कोणी नवरात्री मागणी 

श्वेत गुलाबी रंगावली भासे जणू चांदणी ||१||

*

पंचदली किती देखणी हिरवाई कोंदणी

दोऱ्या कागद सतरंज्या अंबाडी बहुगुणी

सुमने ही लोभसवाणी रूपखणी मोरणी

श्वेत गुलाबी रंगावली भासे जणू चांदणी ||२||

*

आंबट चवीची अन्वष्टा मना ओढ लावते

मंत्रमुग्ध होऊन मीही तिच्या रुपा पाहते 

अलंकार शब्दांचे सारे देते मम् लेखणी

श्वेत गुलाबी रंगावली भासे जणू चांदणी ||३||

☆

© रेणुका धनंजय मार्डीकर

औसा.

मोबा. नं.  ८८५५९१७९१८

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

पितृपक्ष  श्री आशिष  बिवलकर ☆

☆

हिंदू धर्म सांगे | पितरांचे ध्यान |

भोजनाचे पान | पितृपक्ष ||१||

*

सात्विक विचार! चालवती श्राद्ध |

मुक्तीचे प्रारब्ध! पूर्वजांचे ||२||

*

पूर्वपार त्यांनी | जपली संस्कृती |

जीवन स्विकृती | संस्कारांची ||३||

*

काकस्पर्शसाठी | कावकाव साद |

दयावे आशिर्वाद | वारसांना ||४||

*

पंधरवाड्यात | चाले दानधर्म |

दातृवाचे कर्म | स्मरणाने ||५||

*

चौऱ्याऐंशी लक्ष | योनींचे भ्रमण |

जन्मलो आपण | मुक्तीसाठी ||६||

*

हिंदूनी जपावी | संस्कृती महान!

पितरांचे भान | कृतज्ञता ||७||

©️ वास्तवरंग

☆

(चित्र सौजन्य – श्री आशिष बिवलकर) 

© श्री आशिष  बिवलकर

बदलापूर

मो 9518942105

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

करारनामा फक्त चुकला !  श्री आशिष  बिवलकर ☆

☆

ह्रदयाच्या बिऱ्हाडात,

राहतेस तू एकटी |

आणि भाडे दयावे मीच,

रीत कशी ग उलटी |

… लहानतोंडी मोठा घास… सुरेश भट साहेबांच्या या चार ओळीवरून सुचलेली रचना 

– – – 

डोकावले बिऱ्हाडात,

आठवणींचा खजिना |

रमतो तुटण्यात मी,

संपता तो संपेना |

*

हिरे माणकं फिकी,

दिपतो त्या क्षणांनी |

चमक चेहऱ्यावर,

गुलाबी आठवांनी |

*

गंध बकुळ गजऱ्याचा,

मनास सुखावतो |

निर्माल्याच्या गाभाऱ्यात,

येण्यास खुणावतो |

*

भाडेकरू नव्हतीस कधी,

मालकीणच झालीस |

करारनामा फक्त चुकला,

एकटी सोडून गेलीस |

©️ वास्तवरंग

☆

(चित्र सौजन्य – श्री आशिष बिवलकर) 

© श्री आशिष  बिवलकर

बदलापूर

मो 9518942105

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

नीलांबरी शिर्के

श्री प्रमोद वामन वर्तक 

 

  चित्रकाव्य  

गुडघ्याला बाशिंग!   श्री प्रमोद वामन वर्तक ☆

☆

उतावळे बेचाळीस नवरदेव

बसले नटून बाशिंग बांधून 

वाट बघतं भावी भार्यांची 

आर्त डोळ्यात प्राण आणून

*

नाही फिरकल्या नववधू

दिवे लागण झाली तरी 

सुकले हातातले हार तुरे 

शंका दाटून आल्या उरी

*

पंधरा पंचवीस हजाराला 

चुना आयोजकांनी लावला 

खरी गोष्ट सांगता पोलिसांनी

कपाळी हात मारून घेतला

*

लग्न गाठी म्हणे ब्रम्हदेव 

आधीच वर मारून ठेवतो 

पण तुम्हां सारख्या मुर्खांना 

इथलाच कोणी फसवतो

इथलाच कोणी फसवतो

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – pradnyavartak3@gmail.com

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री प्रमोद वामन वर्तक 

 

  चित्रकाव्य  

वंदन तुज मोरया!   श्री प्रमोद वामन वर्तक ☆

☆

होता आपले आगमन

झाला प्रसन्न आसमंत,

दुःख दैन्य पळून गेले

उरली नां कसली भ्रान्त!

*

मखर सजले फुलांनी

केली थोडी रोषणाई,

धूपारतीच्या सुगंधाने 

मन प्रसन्न होऊन जाई!

*

वेळ होता आरतीची

जमती मंडपी मंडळी,

गाऊन अकरा आरत्या 

अंगारा लावती भाळी!

*

ताट नैवेद्याचे गणेशा

तव चरणावर ठेविले,

द्यावी सु्बुद्धी सकला

तुज मनोमनी प्रार्थियले!

तुज मनोमनी प्रार्थियले!

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – pradnyavartak3@gmail.com

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

जिवलग मित्र सारे!  श्री आशिष  बिवलकर ☆

☆

जन्माला जरी आलो एकटा,

मित्रांनी नाही जाणवून दिले एकटेपण!

अनेक सुख दुःख आली,

हाक न मारता धावून आले सारेजण!

*

बालवाडी खेळी एकत्र दमलो,

तारुण्यात मौजमस्तीत रमलो!

तिसरा अंक येईल तेव्हा येईल,

वर्तमानात एकमेकांसाठी जमलो!

*

कधी जरी उदास वाटे मनाला,

डोळे पाहून मनातले सारे वाचतात!

कष्ट करून यश मिळते तेव्हा,

माझ्यापेक्षा तेच आनंदाने नाचतात!

*

आर्थिक प्रगती पुढे मागे असे,

तुलना सुखाची कुणा अंतरी नसे!

एकाच कट्यावर एकत्र सारे बसे,

निखळ मैत्रीचा भाव ह्रदयात वसे!

*

आयुष्यभर साथ दिलीत,

भावनांचा केला नाही कधी धंदा!

अमरपट्टा नाही घेऊन आलो,

जाईन तेव्हा मित्रांचाच मिळू दे खांदा!

©️ वास्तवरंग

☆

(चित्र सौजन्य – श्री आशिष बिवलकर) 

© श्री आशिष  बिवलकर

बदलापूर

मो 9518942105

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

नीलांबरी शिर्के

श्री प्रमोद वामन वर्तक 

 

 

  चित्रकाव्य  

जादू करांगुलीची   श्री प्रमोद वामन वर्तक ☆

☆

बघून आपली पडछाया

राधिका मनी हरखली

मूर्ती ह्रदयी वसलेली 

जणू सामोरी साकारली

*

आनंद सांगे चेहऱ्यावरचा 

सारी किमया करांगुलीची 

जिथे जिथे मी स्पर्श करी 

तिथे तिथे मूर्ती दिसे हरीची

*

निस्सीम भक्ती केशवाची 

सगुण रूपात साकारली 

मूर्ती खट्याळ मोहनाची 

निर्जीव भिंतीवरी अवतरली 

*

प्रेमभऱ्या तिच्या स्पर्शाने 

अवतरे मुकुंदाची छाया 

सांगे सुहास्य मुखावरले 

आज दिसे तिज कन्हैया

आज दिसे तिज कन्हैया

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – pradnyavartak3@gmail.com

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈