श्री सुनील देशपांडे
कवितेचा उत्सव
☆ “आई…” ☆ श्री सुनील देशपांडे ☆
☆
ती होती तेव्हा नव्हता आठव रोजच किंवा कधीतरी
ती नाही आता म्हणूनही ना दु:ख रोज वा कधीतरी
*
मी नाही ऐकत शब्द कुठेही मनी दाटते श्रवण भावना
ती शब्दांच्या पलिकडून मजसी बोलत असते कधीतरी.
*
ती रुंजी घाले मनात अवचित व्यापुन टाकित भाव भावना
ती नाही याची जाणीव व्यापुन खिन्न होतसे कधीतरी
*
ती रागे भरते, चिडते, कुढते मज जाणिव देती सर्व भावना
मी देह हरवतो रडतो चिडतो भांडत बसतो कधीतरी
*
ती आहे ऐसे अजुन वाटण्याइतुकी मजला पुरे भावना
मी प्रेम जगावर करतो निर्जीवावरीही कधीतरी
*
दुःखीकष्टी त्रयस्थ कोणी त्याचेसाठी तीच तगमगे
मी आता गुंतुन बसतो त्या त्रयस्थांमधे कधीतरी
*
ती अशीच करतसे नेहमी नेहमी कुठेही गुंतुन बैसे
मी तिच्यात गुंतत असतो सावरतो मग मी कधीतरी.
☆
© श्री सुनील देशपांडे
email : sunil68deshpande@outlook.com
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
