मराठी साहित्य – कवितेचा उत्सव ☆ आला वसंत सोहळा… ☆ सौ.वनिता संभाजी जांगळे ☆

☆ आला वसंत सोहळा… ☆ सौ. वनिता संभाजी जांगळे ☆

☆

आला वसंत सोहळा

देठ पानास कोवळा

सोनपालवी आडानं

गोड गाते ती कोकिळा

 *

नाविण्याचा हा आनंद

धरा सजण्यात धुंद

मंदावलेला समिर

जाये लुटूनिया गंध

                *              

रंग हिरवा पानात

भाव कोवळा मनात

रानी फुलतो बहावा 

गंधाळूनी आसमंत

 *

रास पिकल्या पानाची

वारा नेतोया  लूटून

जुनाट त्या आठवांची

कर मना बोळवण

 *

सरं आता पानगळ 

उन चौफेर पिवळं 

कुहूकुहू ताल धरी 

किती सुरेल ते बोल

 *

रानीवनी पळसाला

रंग केशरी चढला

किलबिल पाखरानी

सोनआनंद वाटला

☆

© सौ.वनिता संभाजी जांगळे (घागरे)

जांभुळवाडी-पेठ, ता. – वाळवा, जिल्हा – सांगली