श्री तुकाराम दादा पाटील
कवितेचा उत्सव
☆ साद… ☆ प्रा तुकाराम दादा पाटील ☆
☆
ओळखीची साद येता साथ तू ही देत जा
माणसा माणूस आता माणसांचा होत जा
*
भाट राजानें सारे ओसरीला बांधले
तू नको जाऊस तेथे दूर थोडा जात जा
*
लाभले स्वातंत्र्य आहे ते जरासे भोग ना
मौन तू पाळू नको रे गीत साधे गात जा
*
सातबारा नोंदलेला तोच आहे आपला
वतन आहे मालकीचे ते तुझे तू घेत जा
*
फसवणारे लोक जमले खूप झाले भामटे
आत्मरंगी रंगुनीया वेगळा तू -हात जा
*
गरजवंतांच्या पुढे जा पुरव त्यांच्या मागण्या
मागणारा भेटला की देत हाती हात जा
*
देह पुरता पोसण्याला अन्न पाणी घ्यायचे
लागते जगण्यास जितके तेवढे तू खात जा
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
