सुश्री नीलांबरी शिर्के
कवितेचा उत्सव
☆ माझा संसार… ☆ सुश्री नीलांबरी शिर्के ☆
☆
माझा संसार संसार
तवा तापे गॅसवर
मसाला वाटताना
होई मिक्सरची घरघर!!
सखे माझ्या या संसारी
नाही म्हातारी कोतारी
वृद्धाश्रमी पाठवून
सुख शांती लाभे घरी!!
लॅडस्केप बोनसाय
सजवीले घरीदारी
जागा नाही खर्च केली
देवाच्या ग मी देव्हारी!!
माझ्या संसाराला ठेका
डिस्को पाॅप संगिताचा
मिळणार नाही तुला
शब्द येथे आरतीचा!!
सांभाळाया मुलांना ग
बाई खास आहे घरी
काय म्हणते संस्कार
आपोआप होतात ग
मोबाईल टि व्ही वरी!!
माझ्या कपाळीच कुंकू
नाही लालच रंगाच
त्याच कसब ग मोठ
ड्रेससंगे रंगायाच!!
सखे संसार संसार
नाही सुखा पारावार
रूढवादी संस्कारांना
जागा नाही टिचभर!!
☆
© सुश्री नीलांबरी शिर्के
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित /मंजुषा मुळे/गौरी गाडेकर≈
