वनिता संभाजी जांगळे
कवितेचा उत्सव
☆ नदीवर सांज… ☆ वनिता संभाजी जांगळे ☆
☆
लाटांवर लोळते सांज
केशर नदीत बुडते
काठावरच्या झुडपांची
दाट सावली लांबते
सांज शांत नदीवरी
लाट केशरी थरथरते
काचोळ्या पदरात नदी
निळी निळाई झेलते
निळ्या नभीचे केशर
थरथर लाटांवर सांडते
बगळ्यांची रांग तेंव्हा
उंच नभात रेंगते
येतो किनारा अंधारून
पाखरू घरटं शोधते
नदीकाठच्या झुडपात
सांज किलबिल गाते
मंद पावलात सांज
अंधाराला बिलगते
शुभ्र चांदणे झेलण्या
नदी भारावून जाते
☆
© वनिता संभाजी जांगळे (घागरे)
जांभुळवाडी-पेठ, ता. – वाळवा, जिल्हा – सांगली
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
