संगीता कुलकर्णी
कवितेचा उत्सव
☆ पाऊस ☆ सुश्री संगीता कुलकर्णी ☆
☆
नभाच्या अथांग नीलपटलावर
काळ्या मेघांनी स्वप्नांची शाई
सांडली क्षितिजाच्या शांत ओठांवर
पावसाची पहिली कविता उमटली
एकेक थेंब अलगद उतरला
आकाशाचे अश्रू नव्हते
धरतीच्या विरहाला लाभलेले
प्रेमाचे निःशब्द उत्तर होते
मातीच्या गंधात मिसळून गेली
ऋतूंची अनामिक कहाणी
झाडांच्या पानोपानी दाटली
हिरवाईची नवी चांदणी
नदीच्या लाटांनी गुणगुणले
मेघांच्या अंतरीचे गूज
वाऱ्याने उलगडून दाखविले
निसर्गाच्या मनातील सूक्ष्म सूज
पाऊस म्हणजे केवळ जलधारा नव्हे
तो सृष्टीच्या हृदयाचा स्पंदनस्वर आहे
कोरड्या आयुष्याच्या वाळवंटात
उमलणाऱ्या आशेचा अंकुर आहे
थेंबांच्या चिरंतन लयीमध्ये
जीवनाचे तत्त्व दडलेले असते
झिजून विरघळून वाहत राहण्यातच
खरे अस्तित्व फुललेले असते…
☆
© संगीता कुलकर्णी
लेखिका /कवयित्री
ठाणे
9870451020
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित /मंजुषा मुळे/गौरी गाडेकर≈
