वनिता संभाजी जांगळे
कवितेचा उत्सव
☆ दुष्काळ… ☆ वनिता संभाजी जांगळे ☆
☆
दिली पावसानं वड
पिकं गेलं करपून
हाता तोंडाचा घास
गेला मातीत मिटून
*
ये गं ये गं सरी धावून
टाक शिवार भिजवून
माझ्या अंतरीची धग
टाक पावसात विझवून
*
मरगळला हिरवा जीव
वाट रानाची चालवेना
करपल्या पिकाचं दुःख
आता काळजाला सोसेना
*
दडी मारली पावसानं
तापलं भादव्याचं उन
मोहरून आलेलं शिवार
टाकील दुष्काळ गिळून
*
करपल्या पिकाची व्यथा
आता कुणाकडं मांडावी
देवा तुझ्या कृपेची धार
आभाळातनं सांडावी
☆
© वनिता संभाजी जांगळे (घागरे)
जांभुळवाडी-पेठ, ता. – वाळवा, जिल्हा – सांगली
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
