श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # ३४६
☆ मधुचंद्राची रात … ☆ श्री अशोक श्रीपाद भांबुरे ☆
☆
स्पष्ट बोल तू नकोच बोलू येथे मोघम
प्रवासातही तुझीच सोबत असेल कायम
*
विहीर आहे खोल आपली कायम पाणी
बारा महिने शेती पिकवू असाच मोसम
*
या गाण्याचे बोल एवढे मिठास आहे
धुंद तराणे गाऊ आपण सुरात सरगम
*
ऊब नशा ह्या दोन्ही गोष्टी तिच्यात असता
त्याच्यासाठी सांग कशाला घेऊ मी रम
*
मधुचंद्राची रात आपली मस्त दिवानी
मोगऱ्यातली कळी तुझीही खुलेल उत्तम
*
सूप लांबचा पल्ला होता तिने गाठला
महासागरी आज नदीचा झाला संगम
*
नकोय सत्ता प्रेम दिसावे दोघांमधले
दोघांपैकी नकोच कोणी येथे दुय्यम
☆
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
