श्री दिवाकर बुरसे
☆ क्षण सृजनाचा ☆ ‘राग मेघ…’ ☆ श्री दिवाकर बुरसे ☆
काही दिवसांपूर्वी मी माझी ” मल्हार महुडे ” ही कविता रसग्रहणासाठी आपल्याला पाठवली होती.
त्या कवितेतील पाऊस धिंगाणा घालत येणारा आषाढातला पाऊस होता. त्यातले मेघ ” झिंगल्यापरी डोंगर माथ्यावर धडका मारणारे, मत्त गजांसारिखे होते. ”
आताचा हा पाऊस रिमझिमणारा, हळवा आहे. त्याची संतत धार चालू आहे. अशा वेळी एखाद्या विरही नववधूच्या मनाची काय अवस्था असेल बरे!माझ्या या ” मेघ” कवितेतूनच समजून घ्या ना!
☆ मेघ ☆ दिवाकर बुरसे ☆
☆
सय येई पाहुन मेघ नवा
घननीळ सावळा सवे हवा।। ध्रु।।
*
प्रजक्त बहरले चोहिकडे
तरुतळी केशरी सडे सडे
शंकासुर डुलतो बघ भगवा
घननीळ सावळा सवे हवा ।।१।।
*
वेलीवर डुलती कळ्या, फुले
डोहात निळ्या डुलती कमळे
उधळतो गंध हिरवा मरवा
घननीळ सावळा सवे हवा ।।२।।
*
या निळ्या घनातुनि नीर गळे
झेलती परांवर त्या बगळे
जाहला चिंब बघ विहगथवा
घननीळ सावळा सवे हवा।।३।।
*
कानावर येई सूर निळा
ऐकून दाटतो उगा गळा
वा-यास गवसला छंद नवा
घननीळ सावळा सवे हवा ।।४।।
*
घन निळासावळा गगनखुळा
जणु गालावरला तीळ निळा!
तो चुंबाया साजण हळवा
घननीळ सावळा सवे हवा ।।५।।
*
ही कुंद हवा करि धुंद जिवा
हा अनुभव अगदी नवा नवा
वाटतो तरीही हवा हवा!
घननीळ सावळा सवे हवा ।।६।।
☆
© श्री दिवाकर बुरसे
पुणे
संपर्कः ९२८४३००१२५, ९५५२६२९२४५
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
