सौ. रेणुका धनंजय मार्डीकर
चित्रकाव्य
सीता अशोक सौ.रेणुका धनंजय मार्डीकर ☆
(भावगीत)
☆
सीता शोक करताना याने नित्य पाहिलेला
सीता अशोक नावाने अजरामर झालेला ||ध्रु||
*
कामदेवासाठी प्रिय त्याने भात्यात ठेवले
याच्या शांत छायेखाली बुद्ध गौतम जन्मले
आनंदाच्या झाडाने या आनंद सारा दिलेला
सीता अशोक नावाने अजरामर झालेला ||1||
*
फुले केशरी पांढरी गंध सुगंधी देणारी
मधमाशा, किटकांना नित्य कवेत घेणारी
स्त्रियांसाठी गुणकारी बहुगुण हा ल्यालेला
सीता अशोक नावाने अजरामर झालेला ||2||
*
श्वेत पिवळी नारंगी लाल छटेत फुलतो
रक्तअशोक देखणा पर्णसंभार झुलतो
रक्तपल्लव देखणा हळदी कुंकू प्यालेला
सीता अशोक नावाने, अजरामर झालेला ||3||
*
फुले लाल पिवळीशी अंगभर याचा साज
अशोक वाटीकेमध्ये सीतेसवे नाव आज
कवितेत आज माझ्या नावारुपास आलेला
सीता अशोक नावाने अजरामर झालेला ||4||
*
© सौ.रेणुका धनंजय मार्डीकर
औसा.
मोबा. नं. ८८५५९१७९१८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
