सौ. रेणुका धनंजय मार्डीकर
चित्रकाव्य
ये फुली तू सदाफुली गं… सौ.रेणुका धनंजय मार्डीकर ☆
☆
ए फुली तू सदाफुली गं
फुलत रहा राणी
तुझ्या रुपावर भाळ-भाळले
गाते बघ गाणी
*
इथे तिथे तू माझ्या दारी
आपोआप आली
नाही घेतली काळजी तरी
बहरे तव् लाली
*
शुभ्र धवल आणि गोड गुलाबी
पाकळीत झाली
निलवंती तू नभांगणाचे
रंग जणू प्याली
*
सुगंध नाही तुला तरीपण
औषध तव ठाई
तुझ्या रूपाने बहरत जावी
सारी वनराई
*
पाच पाकळ्या तुझ्या साजऱ्या
कधी जांभळ्या लाल
धरणी वरती जणू भासते
फुलाफुलांची शाल
*
कंच हिरव्या पानांमधुनी
डोकावून तू हसशी
कवितेमधली शब्द पाकळी
सदाफुली तू दिसशी
*
© सौ.रेणुका धनंजय मार्डीकर
औसा.
मोबा. नं. ८८५५९१७९१८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
