सौ. रेणुका धनंजय मार्डीकर
चित्रकाव्य
देखणी कर्दळी… सौ.रेणुका धनंजय मार्डीकर ☆
भावगीत- (वर्ण संख्या 14, यती 8 व्या अक्षरावर)
☆
आज माझ्या परसात उमलली कळी
पोपटल्या पानामध्ये देखणी कर्दळी ||ध्रु||
*
सोनकिरणात हिचे रूप दिसे भारी
मोगऱ्याच्या शेजारीच बहरली सारी
कुठे लाल लाल दिसे मधेच पिवळी
पोपटल्या पानांमध्ये देखणी कर्दळी||1||
*
झिरमिर पावसात दवबिंदू सारे
पाकळीला झोका देती हलकेच वारे
गुलाबी रंगात तिची छबीचं कोवळी
पोपटल्या पानांमध्ये देखणी कर्दळी||2||
*
वसंतात हेमंतात शरदात येते
बारामाही फुलणारी औषधही देते
गणेशाच्या मुकुटास रक्तीम पाकळी
पोपटल्या पानांमध्ये देखणी कर्दळी||3||
*
देवकेली म्हणतात केळेफुल हिला
नैवेद्याच्या पानासाठी मानचं पहिला
हिला पाहताच माझ्या पडे गाली खळी
पोपटल्या पानांमध्ये देखणी कर्दळी||4||
*
गंध नाही तरीपण रंगाची झळाळी
शब्दांमध्ये गुंफताना आली ना नव्हाळी
पुष्पहार कवनाचा माउली सावळी
पोपटल्या पानांमध्ये देखणी कर्दळी||5||
© सौ.रेणुका धनंजय मार्डीकर
औसा.
मोबा. नं. ८८५५९१७९१८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
