मराठी साहित्य – चित्रकाव्य ☆ कर्तव्याच्या पदपथावर! ☆ श्री आशिष बिवलकर ☆

श्री आशिष  बिवलकर

  चित्रकाव्य  

कर्तव्याच्या पदपथावर !!  श्री आशिष  बिवलकर ☆

☆

अंधारल्या वाटेवर,

कंदील हाती धरतो |

अनोळखी वाटेवर,

तिमिर सहज सारतो |

*

भय नसतेच मुळी,

अनोळखी वाटांचे |

नौका होऊन झेलतो,

हेलकावे लाटांचे |

*

कंटक आले वाटेत,

घायाळ कसे करतील?

स्पर्श पावलांचा होताच,

टोचणे तेच विसरतील |

*
कर्तव्याच्या पदपथावर,

फुलती मोहाच्या फुलबागा |

रोखून धरतो पावलांना,

हृदयी सत्य-सचोटीचा धागा |

*

कलयुगात ठरे पुण्य दुर्दैवी,

अन् पाप असते भाग्यशाली |

माहित जरी असले सारे,

करतो तत्वांची रखवाली |

*
कोणी कितीही प्रयत्न केले तरी,

जपल्या तत्वांची साथ सुटत नाही | 

यामुळेच आरशात चेहरा पहातांना,

स्वतःची लाज कधीच वाटत नाही |

©️ वास्तवरंग

☆

(चित्र सौजन्य – श्री आशिष बिवलकर) 

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈