सुश्री वर्षा बालगोपाल
चित्रकाव्य
कोरा कॅनव्हास… सुश्री वर्षा बालगोपाल ☆
☆
कोरा कॅनव्हास घेऊन हाती
विठ्ठल रुक्मिणी विवाह रेखीला
भाव सुंदर असा सोहळा
पण कसा कुणी तो न देखीला
*
कुठे आहे असे चित्र यावर
विचारता त्या चित्रकाराला
म्हणाला पंढरपूरला सारे सोहळ्यास जाता
कसे दिसतील ते इथे तुम्हाला?
*
वसंतपंचमी आहे म्हणूनी
रेखीली सरस्वती हंसवाहिनी
ती पण कुठे दिसत का नाही
सांग झणी मला समजावूनी
*
कसे सांगू तुम्हा का न दिसे ती
चित्रकार तो बोले हसूनी
पहा माझी कला वाढवण्या
बसली माझ्या करात येऊनी||
*
गवत खाणाऱ्या गायीचे चित्र
कुठे आहे विचारता खोदूनी
म्हणे गवत खाऊन संपले म्हणूनी
गायही तेथून गेली निघूनी||
*
अशा अगणीत चित्रांचे कोलाज
आहे या कोऱ्या कॅनव्हास वरती
मनःचक्षुने पाहता त्याकडे
चित्रे त्यातील स्पष्ट दिसती||
*
दिसते तसे कधीच नसते
म्हणून तर जग फसत असते
करता विचार तर्क शुद्धीने
चित्र त्यावर सहज प्रकटते||
☆
© सुश्री वर्षा बालगोपाल
मो 9923400506
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
