श्री नंदकुमार पंडित वडेर
प्रतिमेच्या पलिकडले
☆ “जोहार मायबाप जोहार…” ☆ श्री नंदकुमार पंडित वडेर ☆
जोहार मायबाप जोहार… लाख माणसातले तुम्ही एक दिलदार… सण आनंदाचा दिवाळीचा घरीदारी तुमच्या सजला नटला आणि रंगला बी… तुमच्या सदनी कंदील पणत्या लखलखीत तेजाने प्रकाशल्या… तुम्ही नव्या वसनांची घडी मोडलीत.. विविध पक्वान्नांनांच्या फराळाने ताटं भरलीत.. गोडाधोडाच्या चवीने रसनाची तृप्ती झाली… तुमच्या सहीत इष्टगणगोतांचे तुष्टले तन मन ते आनंदाच्या शिडकाव्याने.. सर्व मांगल्याची लक्ष्मी माता तुमच्या सदनी येता… सारं तुमचं लखलाभ होऊ दे हे माझंही तिजला विनम्र असे विनवणं… आणि ते तुमच्या जवळ सांगायला मन माझं बी संतोषलया… मी आलोय तुमच्या दारी परी तुमच्या कडं काहीच नाही मागायला… एक मागणं आहे त्या आई लक्ष्मी पाशी.. सांगाल का माझ्यावतीनं तिजपाशी… माझ्याही चंद्र मौळी झोपडीतपण क्षणभरासाठी येऊन जाशील आता इथं आलीस तशी…. ठाऊक आहे मजला… नि तूलाही… या लेकराच्या घरला गरीबी आणि दारिद्र्याचाच अंधार भरला ठायी ठायी…. स्वाभिमानाच्या पणती मधे कष्टाच्या तेलवातीचा मंदसा एकच आशेचा प्रकाश पसरलाय… माझ्याही घरी तू यावंस अशी भोळीभाबडी आस धरूनी मनी मालकांच्या दारी मी वाटपाहतोय… जोहार मायबाप जोहार… तुमच्या कडची तिची पूजाअर्चा झाली कि सांगाल ना माझा निरोप तिजला… म्हणावं विसरून जाऊन नकोस बरं अजून एक घर वाट पाहतयं तूझ्या आगमनाची आजच्या सांजच्याला… दोन हस्तक जोडून मस्तक झुकलेय खाली तुझ्या चरणावरती टेकण्यासाठी… आनंदाचे दीप उजळलेत या दोन डोळ्यांत… सुख समाधानाचा दर्या उचंबळून राहे हृदयात… कृपा तुझी अखंड राहो आई लक्ष्मी तूझे लेकरू करतेयं दीनवाणी हीच एक मागणी..
#
© श्री नंदकुमार इंदिरा पंडित वडेर
विश्रामबाग, सांगली
मोबाईल-99209 78470 ईमेल –nandkumarpwader@gmail.com
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
