श्री सुधीर करंदीकर
☆ “चला कायम तरुण राहू या का?” ☆ श्री सुधीर करंदीकर ☆
सगळ्यांचच या प्रश्नाला ‘हो’ असंच उत्तर असणार. आणि महिलांचं उत्तर तर ‘हो हो नक्कीच’ असं असणार.
परवा एका कार्यक्रमाला गेलो होतो. कायम तरुण कसे रहावे यावर निरनिराळ्या क्षेत्रामधल्या तज्ञांची भाषणे होती.
सगळ्यांनीच त्यांच्या भाषणांमधून खूप छान छान आणि सोप्या शब्दात माहिती सांगितली. रोजचा व्यायाम, योगा, प्राणायाम, ध्यानधारणा, रोजचे सकाळ संध्याकाळ चालणे, मित्र /नातेवाईक /ओळखीचे यांच्याशी रोज भरपूर गप्पा, गाणी ऐकणे गाणी म्हणणे, रोजच्या खाण्यापिण्याची निवड आणि त्यावर नियंत्रण, वगैरे वगैरे याबद्दल छान आणि सोप्या शब्दात छान माहिती मिळाली. सगळ्यांनीच कार्यक्रम खूप एन्जॉय केला.
एका डॉक्टरांनी सांगितलं की, सीनियर सिटीझन्स यांना कायम तरुण राहायचं असेल आणि तरुण दिसायचं असेल तर काहीतरी नवीन करायला शिका, जे शिकायला आणि करायला कठीण असेल आणि मनाला उत्साह आणि आनंद देणारे असेल.
दुसऱ्या दिवशी मी काल ऐकलेल्या सगळ्या गोष्टी कागदावर लिहून काढल्या, जेणेकरून त्या मित्र-मैत्रिणींबरोबर शेअर करता येतील आणि त्यांचा त्यांना पण फायदा घेता येईल.
कालच्या भाषणांमधला “काहीतरी नवीन करायला शिका, जे शिकायला आणि करायला कठीण असेल”, हा विचार मनाला भावला, पण याकरता काय करावे हे काही लक्षात येईना.
एक विचार आला, की आपण स्वयंपाक करायला शिकावं किंवा घरात झाडलोट करायला शिकावं, किंवा भाज्या निवडणे/ भाज्या चिरणे, अशी नवीन कामं शिकावी, ज्यामुळे डॉक्टरांनी सांगितल्याप्रमाणे नवीन शिकणे होईल आणि बायकोला पण घरातल्या कामात हातभार लागेल. पण मग लक्षात आलं की यामध्ये कठीण असं काहीच नाही. ही कामं खूपच सोपी सोपी आहेत!!!! (महिला कदाचित या विचाराशी सहमत नसतील).
एक विचार आला, की आपण हार्मोनियम किंवा तबला शिकावा. विचार खूप आवडला, पण मग लक्षात आलं कि या करता कुठेतरी जाऊन क्लास लावावा लागेल. असा कुठलाच क्लास घराजवळ नसल्यामुळे, कुठेतरी लांब जावे लागणार, म्हणजे स्कूटरवर जाणे आले/ ट्रॅफिक आला, वगैरे वगैरे. म्हणून हा विचार रद्द केला.
मग विचार केला की आपण हॉलीबॉल, फुटबॉल, लॉन टेनिस, असा काहीतरी खेळ शिकावा. नवीन शिकणे पण होईल आणि असे खेळणे कठीण पण आहे. बायकोला हा विचार सांगितला. बायको म्हणाली एकदा मोठ्या आरशामध्ये स्वतःला बघा आणि मग डिसिजन घ्या. बायको म्हणेल ते नेहमीच ऐकावे अशी सवय असल्यामुळे लगेच आरश्यासमोर गेलो. स्वतःकडे बघितलं आणि लक्षात आलं की फुटबॉल हॉलीबॉल टेनिस सारखे खेळ आपल्या शरीराला झेपण्या पलीकडचे आहेत.
काय करावे, काय करावे असा विचार करत होतो. माझा नेहमीचा अनुभव म्हणजे एखाद्या गोष्टीचे उत्तर सापडत नसले तर वर बघायचं आणि आपोआप उत्तर सापडतं. म्हणून मी काय करावे काय करावे असा विचार करत वर बघितले. आणि मला उत्तर मिळाले.
नाच करायला शिक, असे उत्तर मला मिळाले. डॉक्टरांनी सांगितलेल्या व्याख्येप्रमाणे माझ्याकरता हे नवीन तर आहेच आणि शिकायला पण कठीण आहे, आणि उत्साह/ आनंद वाढवणारे तर नक्कीच आहे.
नाच म्हटल्याबरोबर माझ्यासमोर नाती कडून नाच शिकणे हा पर्याय पुढे आला.
नात नाचामध्ये एकदम एक्सपर्ट आहे. बऱ्याच ठिकाणी तिचे कार्यक्रम पण होतात. लगेच नातीला फोन केला, आणि वेळा आणि वार ठरवून नाच शिकायला सुरुवात केली.
आता घरी पण रोज नाचाची प्रॅक्टिस करतो आणि मस्त एन्जॉय करतो.
रोज नाच केल्यानंतर, छान शिकवण दिली म्हणून मी कार्यक्रमामधल्या डॉक्टरांचे आभार मानतो/ नाच शिकवल्याबद्दल नातीचे आभार मानतो/ आणि वर बघून ही कल्पना सुचली म्हणून देवाला नमस्कार करतो. आणि बायकोचे पण आभार मानतो.
कायम तरुण राहणे हे तरुण मंडळींना पण आवडणार आणि वयस्कर मंडळींना पण आवडणार (यामध्ये महिलांचा सहभाग नक्की जास्त असणार). चला तर मग नवीन काय करायला शिकायचे ते ठरवा आणि सुरू व्हा…
अशा कुठल्याही छान कार्याकरता रोजच छान मुहूर्त असतो…
© श्री सुधीर करंदीकर
मो. 9225631100 – ईमेल – srkarandikar@gmail. com
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
