सौ राधिका -माजगावकर- पंडित
☆ ‘ऐक ना देवा!’ ☆ सौ राधिका -माजगावकर- पंडित ☆
नुसतं मागणं नाही रे बाबा! तर तुझ्यापाशी केलेला हा हट्टच समज.
— मातेच्या गर्भातून आल्यावर मायेची ‘कुस’ मला दे. बेंबीच्या देठापासून रडायला, “मी आलोय” हे जगाला सांगायला खणखणीत कंठ मला देशील नां?
— मोकळ्या हवेतला मोकळा श्वास मला घ्यायचाय.
— इवलेसे हात पाय झाडून हट्ट करायला लाडाचे आजी आजोबा मला हवेत.
— देवा अरे! शाळेत जाण्याइतका मोठा होईन ना मी, तेव्हां हे बुद्धीदात्या, गणेशा मला चांगली बुद्धी हवीच ना रे! .. करशील माझ्यावर कृपा देशील मला सद्बुद्धी?
— तारुण्यात मस्ती जगण्यासाठी पैलवानी ताकद दे, उत्साहाचं वारं नसानसांतून वहायला हवंय मला.
तर मग दे नां मला हंडाभर उत्साहाचं वाण आणि सामर्थ्याचं दान.
— सुखस्वप्नांच्या पायघड्यांवरून चालतांना जोडीदाराची आणि तिच्या कोमल हाताची साथ मला लागेलचं नां! . सुखदुःखात मला तुझीही साथ हवी आहे.
— सरला भूतकाळ सरलं आयुष्य. डोकावतयं वार्धक्य, आता अजून एक मागणं…
चालायला धडधाकट हातपाय हवेत. तसंच बोलतांना खातांना जिभेवर ताबा हा हवाच. मनाचं उधळणारं घोडं आवरायला स्थितप्रज्ञतेचा लगाम देशील नां?
— दुःखाचे कढ जिरवण्यासाठी ओठांवर विलसणारं हंसू दे. लहानपणी दिलंस ना अगदी तसंच बोळक्यातलं निरागस हसू परत द्यायला विसरू नकोस रे बाबा! आतां आयुष्यात तेवढच सुख आणि विरंगुळा आहे.
— बऱ्या वाईट कर्मांचा हिशोब तुझ्यापुढे मांडल्यावर तुझ्या कृपेचं, आरोग्याचे दान पदरात पाडून घ्यायचं आहे,
— अरे देवा! तू अगदी मुक्तहस्ताने, भरभरून देशीलच रे! पण माझीच झोळी फाटकी, अपुरी आहे. पण ऐक ना! मी ती आनंदाच्या तुझ्या नामस्मरणाच्या पवित्र धाग्यांनी भरभक्कम शिवलीय.
— मग टाकतोस ना माझ्या झोळीत तुझ्या कृपेचं, आशीर्वादाचं दान?
देवाधिदेवा…
हेची आता शेवटचे मागणे…
यावे तुझ्या दरबारातले लवकरात लवकरचे बोलावणे…
© सौ राधिका -माजगावकर- पंडित
पुणे – 51
मो. 8451027554
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
