प्रभा सोनवणे
कवितेच्या प्रदेशात # ३२९
☆ गीत – प्रेमभावना… ☆ प्रभा सोनवणे ☆
☆
स्वप्नात साजणा येऊ नको
अन साद मला तू घालू नको ॥धृ॥
*
ही अवखळ माझी प्रीत
कशी पाळू मी जनरीत
होईल बोभाटा नगरीत
बदनाम मला तू करू नको… १
*
हा कसा प्रीतीचा ध्यास
एक जीवघेणा हव्यास
चहूकडे तुझाच रे भास
हे वेड जीवाला लावू नको… २
*
विसरणे तुला अशक्य जरी
प्रीत तुझी अप्राप्य परी
ही प्रेमभावना धुमसते उरी
तू फुंकर त्यावर घालू नको… ३
*
मी जळून झाले खाक
मज माझाच वाटे धाक
राहिली चुकून ठिणगी एक
तू वणवा आता चेतवू नको… ४
*
स्वप्नात साजणा येऊ नको
अन साद मला तू घालू नको ॥
जुन्या डायरीतून… अप्रकाशित रचना
☆
© प्रभा सोनवणे
२५ नोव्हेंबर १९९२
संपर्क – “सोनवणे हाऊस”, ३४८ सोमवार
पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- sonawane.prabha@gmail.com
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित / मंजुषा मुळे/ गौरी गाडेकर≈
