मंजुषा सुनीत मुळे
कवितेचा उत्सव
☆ “क्षण…” ☆ मंजुषा सुनीत मुळे ☆
*
व्यस्त व्यग्र दिवसातले
मोजकेच निसटते पण मोहक क्षण
भेटतात मला न चुकता
चोरून भेटणाऱ्या प्रेयसीसारखे – –
आसाभोवती फिरणाऱ्या चाकासारखं
आयुष्याला जखडून फिरतांना
मनाची झीज थोपवायला
धावून येतात हे क्षण .. वंगणासारखे – –
चहूबाजूंनी मनावर कोसळू पहाणारा
आघातांचा बेभान पाऊस
निश्चलतेच्या गोवर्धनावर थोपवण्यासाठी
पुरतात हे क्षण .. कृष्णाच्या करंगळीसारखे – –
उदास निराश काळोखात
अंदाजानेच चाचपडतांना
हळूच वाट दाखवतात हे
आशेचे प्रकाशकण होऊन .. काजव्यांसारखे – –
नकळत पहाते वाट मी
या संजीवक अनमोल क्षणांची
जेव्हा उरते फक्त मीपणच माझे
वादळवाऱ्यात एकाट देवळात .. ..
मिणमिणणाऱ्या पणतीसारखे – – –
☆
© मंजुषा सुनीत मुळे
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
खूप सुंदर कविता मंजूषाताई