मराठी साहित्य – चित्रकाव्य ☆ अशी दिसे कळलावी… ☆ सौ.रेणुका धनंजय मार्डीकर ☆

सौ. रेणुका धनंजय मार्डीकर

  चित्रकाव्य  

अशी दिसे कळलावी… सौ.रेणुका धनंजय मार्डीकर ☆

☆

उत्सवाचा हा श्रावण 

निसर्गात ज्योत लावी 

समईतल्या त्या ज्योती 

अशी दिसे कळलावी 

*
 घाटमाथ्यावर पहा 

 हिचे देखणेसे रूप

 पंचारती ओवाळते 

 वल्लरीही सुस्वरूप 

*

 अग्निमुखी म्हणतात

 अग्निशिखा, कलहारी 

 खड्यानाग, बचनाग

 नावे हिची किती सारी

*

 आधी हिरवी, पिवळी

 नारंगी नी, लाले लाल

 फुले दिसती साजरी 

 जणू तेजाळे मशाल

*

 गौरी गणपतीसाठी 

 हात गौरीचे म्हणती 

 बहु गुणकारी आहे 

 झाली औषधी गणती

*

 नामशेष होत आहे 

 बहुगुणी कळलावी 

 करू तिचे संवर्धन 

 आणि काळजीही घ्यावी 

*

 सातपुड्याच्या घाटात 

 होते मी पाहिले हिला 

 आज शब्दातून माझ्या 

 काव्य बहारही दिला 

☆