मराठी साहित्य – इंद्रधनुष्य ☆ ह रिश्चंद्राची नव्हे, सारंगची फॅक्टरी! ☆ श्री सुहास रघुनाथ पंडित श्री सुहास रघुनाथ पंडित ☆

श्री सुहास रघुनाथ पंडित

 इंद्रधनुष्य 

☆ हरिश्चंद्राची नव्हे, सारंगची फॅक्टरी! ☆ श्री सुहास रघुनाथ पंडित ☆

काही वर्षांपूर्वी ‘ हरिश्चंद्राची फॅक्टरी ‘ या नावाचा चित्रपट प्रदर्शित झाला होता. भारतीय चित्रपटाच्या जन्माची कथा सांगणारा हा चित्रपट! भारतीय चित्रपट सृष्टीचे जनक दादासाहेब फाळके यांच्यापासून अगदी अलीकडच्या काळातील चित्रपटापर्यंतचा प्रवास उलगडून दाखवणारा एक माहितीपट पाहण्याचे भाग्य सध्या सांगलीकरांना लाभत आहे. निमित्त गणेशोत्सवाचे!

लोकमान्य टिळकांनी जनजागृतीसाठी सार्वजनिक गणेशोत्सव सुरु केला. प्रबोधनाच्या मूळ उद्देशापासून भरकटत चाललेल्या गणेशोत्सवाचे सध्याचे रुप पाहून हळहळणे, टिका करणे फक्त एवढेच केले जाते. अशा काळात सार्वजनिक नाही तर वैयक्तिक, घरातील गणेशा समोर उद्बोधक आरास मांडावी व लोकांसमोर काही चांगले ठेवावे असा उपक्रम सांगली येथील श्री. संजय पाटील व त्यांचे चिरंजीव श्री. सारंग पाटील यांनी गेली काही वर्षे चालू ठेवला आहे.

श्री. सारंग पाटील यांनी आपल्या कल्पकतेतून या वर्षी मराठी चित्रपट सृष्टीचा इतिहास प्रतिकृतीच्या स्वरूपात मांडला आहे. दादासाहेब फाळके या मराठी माणसाने अत्यंत धाडसाने टाकलेले हे पाऊल आज किती अंतर कापून पुढे गेले आहे याची प्रचिती ‘ मराठी पाऊल पडते पुढे ‘ या अर्ध्या तासाच्या दृश्य कार्यक्रमातून दिसून येते. मराठी चित्रपट सृष्टीतील महत्वाचे टप्पे व झालेल्या नेत्रदीपक प्रगतीमध्ये ज्यांनी योगदान दिले त्यांचे स्मरण करून चित्रफिती व आकर्षक प्रतिकृती यांच्या सहाय्याने हा इतिहास मांडण्याचे कठीण काम श्री. सारंग पाटील यांनी करुन दाखवले आहे. आईवडिलांचे प्रोत्साहन व योग्य मार्गदर्शन असेल तर कल्पकता काय साकारु शकते याचे हे उत्तम उदाहरण आहे. मराठी चलत् चित्रपटाच्या इतिहासाचा चलत् चित्रपट असेच याचे वर्णन करावे लागेल. मराठी माणसाची पाऊले आवर्जून इकडे पडावीत एवढीच अपेक्षा!

┉❀꧁꧂❀┉

©  श्री सुहास रघुनाथ पंडित 

सांगली (महाराष्ट्र), मो – 9421225491

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈